K1 (3rd) Interview @靈糧

突登拎左半日大假，呀寶5點幾要INTERVIEW，根本之前呀寶表現，都唔洗擔心，又因為靈糧係半日，所以都痳痳地，報左就去IN 啦！

之前係網上睇評語，呢間幼稚園由INTERVIEW到通知結果都係透過網上完成，極為方便。另外，各方面分配都好好，時間好準時。

我同呀寶都好趕去到，無遲到，仲早左少少，但係因為佢地遲左0既關係，呀寶都等左好耐。可能因為呢個原因，今日呀寶表現並唔係我預期。

一入到去，交左登記紙，跟住就入去一間課室到玩，玩完等老師叫名入去睇下學校影片，好自然呀寶梗係周圍走啦。跟住就叫名入去考室到。入到去，小朋友可以隨處係課室到玩佢地鍾意0既玩具。

而呀寶就呢一樣掂下，就去第二到，再掂下去第三度，就咁就in完呢一part喇。(如果我係老師根本就觀察唔到)

隨後大家就入去第二個課室到聽老師唱歌仔同做動作，校長同埋主任隨後入黎睇下各小朋友0既表現。

d老師唱歌表現真係幾得，d動作幾吸引到小朋友，不過呀寶不嬲坐唔定，呢part表現都係唔好，當老師唱緊歌時，呀寶好大聲話︰我唔唱歌！到老師叫佢個名時佢都無反應，只係望住老師，老師比左張咭佢時，又無講多謝。

總結黎講，呢間學校，學校設備幾好，佈置方面好得意，有d仲係立體公仔，小朋水見到會覺得好新奇，好多玩具。

可能係連鎖學校0既關係，老師衣著好靚好統一，全部老師都係著黑色連身裙，加紅色外套，黑色鞋同埋同色襪褲，感覺好得體。